YAMASHITA TREASURE

MAY LIMAMPUNG taon nang tapos ang Ikalawang Digmaang Pandaiddig. Pero may isang kontrobersyal na isyung pinagkakagulohang magpahanggang sa ngayon. Ang alamat ng kayaman ni Yamashita, na kabuntot nang ating ala-ala na hindi pa rin mapawi sa utak ng mga Pilipino, at, marahil, pati na rin sa mga banyaga na dumarayo rito upang hanapin ang nawawalang katakut-takot na ginto. Ito ang kayamanang ipinabaon umano ni Tomoyuki Yamashita, isang heneral ng imperyal na hukbong sandatahan ng Japon na nadestino rito noong panahon ng digmaan.

Sinasabing ang kayamanang ito ay binubuo ng mga nakaw na kayamanang galing sa mga ibang bansang Asyano na sinakop ng Japon noong panahong iyon. Hinakot daw ni Heneral Yamashita mula sa Malaya, Singapore, Thailand at iba pa ang maraming alahas, mga gintong pigurin – kasama na ang bantog na gintong Buddha – at mga gintong bara.

Sangayon sa mga kuwento, dinala raw ni Yamashita ang mga kayamanang ito sa Pilipinas nang madestino siya rito noong 1942. Sa pagaakalang mananalo sila sa pakikidigma laban sa America, at ang Filipinas ang gagawin niyang bantayog o colonia ng kanyang kapangyarihan. Pero nang malapit na raw magapi ang pwersa ng Japon dito, dala-dala pa rin ni Yamashita ang mga kayamanan sa kanyang pagtakas.

Kasama ng kanyang mga sundalo, si Yamashita ay lumaban pa rin sa mga pwersa ng mga Amerikano patungong Bulubundukin ng Caraballo, malapit sa Benguet at Nueva Ecija. Tangay-tangay pa rin daw ni Yamashita ang mga kayamanan at ipinabaon niya ang mga ito sa mga kuweba sa Ifugao. Pagkatapos ipinapatay niya umano ang mga sundalong nag-asikaso sa pagbabaon ng mga kayamanan sa pagnanasang mailihim ang lugar na pinagtaguan nito. At ang isa pang dahilan kung bakit ito ginagawa ay sangayon sa kanilang paniniwala na ang mga binaong tao o sundalong kasama na nasabing kayamanan, ang magsisilbing bantay upang iligaw ang sino mang nagtatangkang hukayin ito. Kaya may mga treasure hunters, na dahil sa paniniwalang ito’y nag-dadala ng alay para sa kanila at sa mga encantong naka-bantay sa nakabaong ginto. Upang sa pamamagitan nito, hindi magalit ang Bantay at mapayapang ibigay sa kanilang ang naturang kayamanan.

Nang sumuko ang Japon sa mga Amerikano noong 1945, hinuli si Yamashita at binitay dahil sa kanyang mga kasalanang nagawa noong panahon ng digmaan. Pero hindi sumama sa kanyang kamatayan ang lihim ng kanyang ipinabaong kayamanan. Pilit itong umukilkil sa ala-ala ng mga taong nakasaksi sa mga pangyayari at parang may batobalaning nangaakit upang ito’y hanapin at hukayin. Kaya nang matapos ang digmaan, marami ang nagkainteres sa paghahanap nito.